maa kasvatas paju, ma tuu paju võsast kodo ja anna kitsilõ, kitsõ süüva kasvu ja kuure ning andva sõnnikut, piima ja liha, tuul ja päiv kuivatasõ paju, ma panõ paju pliidi ala ning saa lämmit, tii süvva, tuhk a lätt jälki maalõ. ei üttegi katkestatu ahõlat, kõk käü kipõlt tsõõri piten.
sai sõs lõpus ette võetus pasta tegeminõ, massina ma tõi juba talvõl liinast. pernaanõ pühkse massinalt tolmu, tei valmis tahasõ ja lätski pasta tegeminõ valla. nuurprnaanõ ai masinat ringi ja tõsest otsast tulli makaroni vällä. üts päiv kuiumist ja sõs kiima. küll sai hää. eesti uma mahe makaroni umma kistumalda kalli ja nii saigi asi esi ette võetus, kuna kõk omma makaroni sõbra, eriti nuurpernaanõ.
ütspäiv teimi retke ess-suussõ. sõimi talvõ ulõ elanu kurõmarju, kaimi hähna süügilauda, laukit, kusiraudsiku pesä jne. ilm oll illos ja miil hää. õnne süämõn väiku okas, kas suu varsti inämp alalõ om, kui kaivandaja saa õks vaatamata urvastõ rahva võitlusõlõ turvast kaibma nakata.
eelä olli kits klaara ummi poigega aiast vällä lipsanu ja sõie isukalt nurme pääl edimäst haljast haina. mu hummukunõ vaatlus, ei täheldanu nurmel joht midägi süüdavat, a kuna ma kits ei olõ, sõs jäiva roihlise hainatuti tähele pandmata. vei sõs tõse kitse kah vällä, oi määndse isoga na süüma naksi, terve pikk talv kuiva haina pääl oldu, sõs lät ka mõne sentimeetri pikkune hainalible asa ette.
vahepääl omma ello jäänü tallõ kimmält kasunu ja mitu nädälit vällän saanu olla. omma väega asaliku tegelasõ, süüva juba piima kõrvalõ haina kah.
polõ mitu hääd aastat kõomahla saanu, a seo aasta pandse esä mul vanna-muudu sõs mahla tsilkma. eela saimi sõs edimäsõ pange tävvä. kõiv om veidü vesitse kotussõ pääl ja mahlal vähe makõt maitsat, a muidu om õks hää. kaemi, kas saa suvõs hapnõma ka panda. ka kitsilõ paistus mahl miildüvat.
täämpätsõl aol om võimalus kohata fred jüssit, sääne nagu mõtsan sutti nätä. a miil seo õnnestus.kävemi läänemaal ekspeditsioonil ja häädel sõpradel külan ning nema juhativa ao ja kotussõ kos või säändsõst haruldasõst sündmusõst osa saia. ehk sõs eela keskpäävan saunja opikujan. fred kõnel sääl latsilõ tsirkõist ja luudusõst. ma es olnu joht tedä ehedält nännü, õks läbü teleka vai raadioaparaadi. timä jutu ja luu olliva õks sama õten kiskva ja lummava. ma olõ tima lugudõst pallo opnu ja ole pallo opnu timä ütlemalda jätmisõist.